الحمدلله يارب .. صرنا بعشرة رمضان .. عشر تيام مرت و20 يوم بالدرب .. الله يعطينا وياكم طولة العمر ونشوف رمضان السنة اليايه واللي بعدها واللي بعدها واللي بعدها واللي بعد 100 سنة ان شاء الله ...
بما اني صرت بـ10 رمضان .. اليوم قعدت اسأل نفسي
شسويت انا بهالعشرتيام اللي مرو؟ شنو الشي اللي قدرت اسويه!
صراحة اكتشفت اني ماسويت شي غير اني اتابع المسلسلات اللي مشالله موملحقين عليها .. صرنا مانعرف شنو نطالع .. كل قناة تحط مسلسلاتها بنفس الوقت اوفففففف .. مرات اتمنى ان اليوم يكون اطول من24 ساعة عشان بس الحق اطالع المسلسلات!
المهم عاد اليوم ودي اتحجى عن المسلسلات اللي شفتها واللي اسمع عنها وماشفتها :-)
صراحة في مسلسلات احرص اني اتابعها كل يوم وفي مسلسلات اذا شفتها شفتها واذا ماشفتها مايهمني
يعني مثلن من المسلسلات اللي احرص اني اشوفها كل يوم : فضة قلبها ابيض , ابلة نورة , ظل الياسمين ..هذيل بس المسلسلات اللي يهمني اني اشوفهم يومياً وما اطوف حلقة
بس المسلسلات اللي شفتها وحبيتها بس ماتابعتها كل يوم عاد وايد مثل عيال قرية وأيدي امينة وبنت من الزمن ده ودندرمة وباب الحارة .. الخ
والمسلسلات اللي لو شيصير ما اضيع وقتي واشوفها عد وخربط .. ياكثرهم المسلسلات السخيفة واللي مالها داعي كلش مادري ليش يتعبون ويسوونها مثل عائلتي السخيف وجامعة اي شي المليق وعيون عليا اللي مادري شنو الحلو بعيونها وواااااايد واااايد غيرهم
بس صراحة الشي اللي حطم الرقم القياسي بالسخافة والملاقة والتفاهة والمصاخة والخرابيط اهوا "فوازير وراها وراها" مالت ميساء مغربي ومحمود بوشهري يعني اوفففففففف كلمة مليق عليه شوية!!! يعني مو كافي صدمة فوازير حليمة رمضان اللي طاف اللي لما الحين مأثرة على اعصابنا بعد يعرضونا لصدمة يديدة!!! اليوم وانا عالفطور قاعده اطالعهم اختي قاعده يمي .. تقول اليوم وحده بالدوام تقول واعلية محمود بوشهري بدون .. حسيت كسر خاطري مادري ليش! وتقول ان عايلته مو بوشهري عايلته اسمها مومالين مادري شنو .. المهم ان بدون .. عورني قلبي شوية بس من كثر ملاقتهم كرهته كرهته :-@
عموماً قناة الراي بكبرها فاشلة وخايسة وبرامجها تلوع الجبد .. ولا شي عليها حلو!! مسوين احتكار حق طارق العلي وصاير وياهم مليق ودمه ثقيل .. وداود حسين مسكين مادري منو اللي يتابعه احس طاح سوقه بشكل قوي
ومسوين مثل كارتون انيميشن بعد اسمه ام سعف .. اوفففففففففففففففففف ملاقة وخااايس يبون يقلدون ام خماس مال دبي غصب!! شكلهم بايخ والرسم بايخ وحركتهم بايخة واصواتهم ابيخ وسوالفهم بايخه .. يعني ودي افهم ليش يقلدون لييش!!! قناة الراي المفروض تدش موسوعة غينس من كثر ماتقلد دبي وام بي سي .. يعني الوطن مسوين انيميشن بوقتادة وبونبيل وحلو وايد ورسمهم خفيف وسوالفهم بعدحلوة ويقدمون بلاك كوميدي .. يعني كارتون له معنى .. بس ام سعف اسخف شي بالكون وقناة الراي اثبتت انها قناة فاشلة بجدارة
جني تحلطمت وايد؟
المهم ماكنت ناوية اتكلم عن هالشي اساساً .. كنت ابي اتكلم عن مسلسلاتي المفضلة بس
خلونا نرجع لهم
1-ظل الياسمين
قصة حلوة وروعة .. صج اني ماحب اشوف مسلسلات اللي تتكلم عن الماضي وجذي .. بس اعتبر قصة ظل الياسمين ماتعبر بس عن الوضع بالماضي .. تعبر عن الماضي والحاضر والمستقبل بعد .. انصحكم تشوفونها لان صج ماراح تحسون ان وقتكم يضيع وانتو اتابعونه .. القصة من تأليف المبدعة وداد الكواري .. واكيد كاتبة معروفة وناجحة وعمرها ماكتبت مسلسل الا ونجح وكان نمبر ون بكل رمضان من بين المسلسلات الخليجية .. ابرك من فجر السعيد اللي مسلسلاتها تفشل وعبالها عايشين بأمريكا كله عصابات ورجال اعمال وكل ممثلة شمتنها كبر البقرة ولابسة دراعة لو انا لبستها احس جسمي يتعب من كثر ما الدراعة ثقيلة .. المهم خلونا نرجع لمحور حديثنا .. يعني الزبدة انصحكم تشوفونه وبس .. يطلع ساعه 9 عالام بي سي ون
2-فضة قلبها ابيض
هم بعد قصة حلوة وفكرة يديدة وسعاد عبدالله بهالمسلسل اثبتت انها ممثلة محترفة وان خبرة فوق 30 سنة بالفن ماكانت عالفاضي .. صراحة هالمسلسل اللي صج يعور قلبي ويذبحني بعد لما اشوفه احس نفسي ببجي .. قصة حلوة وممثلين حلوين وكل شي فيها حلو .. يعني هالمسلسل الوحيد الي لما اشوفه احس كل اللي فيه يعرفون يمثلون .. اول مسلسل خليجي اشوفه يكون جذي .. العادة لازم يطلعون جم واحد بالمسلسل تمثيلهم خايس ويخربون المسلسل .. بس فضة قلبها ابيض بروفيشينال .. ويطلع ساعة 1 بالليل على ابوظبي
3-ابلة نورة
مسلسل مافيه زود .. ينفع يشوفونه التين أيجرز واليهالو .. القصة عن ناظرة بثانوية بنات .. وسوالف البنات عاد ومشاكلهم والابلات وطريقتهم وحياتهم الشخصية .. يعني قصة مستهلكة .. بس اشوفه لاني احب حياة الفهد واحب المسلسلا ت اللي فيها سوالف بنات ومادري شنو .. احس جني قاعده وياهم ..لان المسلسل كله من اوله لي اخره عبارة عن سوالف وبلاوي .. وابلة نورة مثل الملاك تمشي وماتحط ايدها على مشكلة الا وتنحل وتصير تمام .. طبعاً اهيا قمة بالمثالية .. ادري لوعت جبودكم وماودكم تشوفونه .. بس صدقوني حلو .. عالاقل شي يستاهل ان ينحط عالتلفزيون .. مو فوازير وراها وراها اللي استغفرالله من اشوفها تنسد نفسي عن الفطور .. هالغبية ميساء مغربي اهيا صج حلوة بس تبدع بالمكياج وتحط شغل هلاقة .. مادري منو الغبي اللي يحطلها مكياج.. وبعدين مادري ليش يعني كل وحده تطلع تسوي فوازير يصبغونها ذهبي؟؟؟ ميساء على حليمة!! كلهم يقلدون شيريهان ونيللي .. عبالهم اذا اصبغو نفسهم ذهبي ولا فضي خلاص بينجحون .. طلعت عن مسار الموضوع ..أي موضوع؟؟ خلاص خلصت بس بعد ماعندي شي اقوله
وكل عام وانتو بخير
4 comments:
هاي امل شلوونج ,, بصرااحه قضيه المسلسلاات صارت قضيه مفرووضه عليناا يعني كل قنااة قاعده تسوي بهالمسلسلات و تشتريهاا مو همهاا مضموون مسلسل منهم همهاا بس اشتري مسلسل يمثل في الفنان الفلاني علساس اسوق حق السلعه الفلاانيه يعني لو بتشووفين و تلاحظين شغله لو المسلسل مدته مثلا 20 دقيقه يصير اربعين دقيه اذا مو اكثر و السبه الاعلانات يعني حتى لو انه مسلسل زين ما راح تفهم شنو مضموونه و شنو عنه و السبه التقطع حق الدعايات .
هاي نصوور .. انت راح تدش التاريخ من اوسع ابوابه .. لانك اول شخص يحطلي كومنت بهالبلوق اللي راح يكسر الدنيا "احم احم" والله اذا يايه عالدعايات بس جان تهون لان مثل ماقلت الحين صار غرض المسلسلات تجاري .. بس المشكلة الاكبر ان يسوونلك 100 مسلسل و90 مسلسل منهم خايسين ومامنهم فايدة!
الممثلين صارو اكثر من الجمهور .. المطربين صارو اكثر من الجمهور .. المذيعين صارو اكثر من الجمهور .. انا مادري بعد يسوون البرامج والمسلسلات حق منو! بس بالاخير الزين يفرض نفسه ;)
fitha ti6la3 bil Kuwait ba3ad sa3a 4:30 ;)
هاى حبيبتى
اولا بحييكى على اسلوبك صريحة واثقة جريئة شاطرة
فخر للاعلام
بس خففى من اسلوبك شوى عشان ما حدا يعاديكى
بالنسبة االى انا ما تابعت ولا مسلسل بس بعد كلامك تابعت المسلسلات الى حكيتى عنهن
ابلة نورة عجبتنى كتير تحفة خاصة جو البنات والمدارس اشىء حلو
فضة قلبها ابيض حضرت حلقة حلوة فعلا قلبها زى الاطفال
ظل الياسمين ما حبيتها مع انى بموت بوداد الكوارى اذا ما خانتنى الذاكرة هى نفسها موجودة بزهرة الخليج صح مقالاتها حلوين وهى من قطر
باب الحارة حضرت حلقة والعام الماضى حضرت حلقتين هههههه
حلو بس ما تابعته
نهايته هالعام كتيير مسلسلات على الفاضى
فيه كمان دموع الورد تركى كتير حلو
شكرا حبيبتى وراح اعلق على باقى المواضيع
بس بجد برفع الك القبعة بتفهمى بكله سياسة وفن
يخليلنا اياكى يارب
يعطيك الف عافية يارب
Post a Comment